Suhiltzaileen arropak, espazio ontzien isolamenduak eta oso sakon lurperatutako detektagailuen estalkiek erabil lezakete isolamendu termikoko material berri bat. Zientzialarien taldeak frogatu du aerogel zeramikoak isolamendu termiko handiagoa duela gaur egun aplikazio horietarako erabiltzen diren materialek baino. Aerogel zeramikoak material ultraporotsuak dira, eta aire poltsa txikiak bereizten dituzten zeramikazko geruza finez osatuta daude. Aerogel zeramiko tipikoa % 99 da airea.
EB Errusiarekiko independentzia ekonomikoa lortzeko lanean ari den bitartean, lehengaien eskariaren hazkunde esponentzialak hornidura arriskuak sortzen ditu, Txinarekiko mendekotasun handia dela eta. Munduko Bankuaren proiekzioen arabera, lehengai kritikoen eskaria % 500 igoko da 2050era arte. Garapen hori, hein handi batean, trantsizio berdeak bultzatzen du, energiaren nazioarteko agentziak (IEA) argitaratutako txostenaren arabera.
Batzordeak aurkeztu du, batetik, funtsezko adierazleen zerrenda bat EBren ingurumen- eta klima-helburuak 2030erako lortzeko bidean egindako aurrerapenak gainbegiratzeko eta, bestetik, 2050erako epe luzeko ikuspegi hau: «Ongi bizi, gure planetaren mugen barruan». Alderdi interesdunei eta estatu kideei egindako kontsulta sakonen ondorioz, Ingurumen arloko VIII. Ekintza Programaren jarraipen-esparru berriaren helburua da gardentasuna sustatzea eta Europako herritarrei informazioa ematea EBko klima- eta ingurumen-politikaren eraginari buruz.
Espainiak 274,9 milioi euro gehiago jaso ditu 2022ko REACT-EB tartetik. Baliabide horiek Espainiako eskualdeen susperraldi ekonomikoa bultzatuko dute, langileei eta enplegu eskatzaileei trantsizio digitalerako eta ekologikorako beharrezkoak diren gaitasunak eskuratzen lagunduko diete, eta gizarte-sistemetarako sarbidea eta horien funtzionamendua hobetuko dituzte. 137 milioi euro gehitu zaizkio Espainiako Pertsona Behartsuenendako Laguntzen Funtsaren programa operatiboari, eta gainerako baliabideak, 137,9 milioi euro, Europako Gizarte Funtsaren programei.
MITECOk energia berriztagarrien hirugarren enkanterako deialdia egin du, 520 MW-koa, bi kupotan banatuta: bata 140 MW-koa, fotovoltaiko banaturako, 5 MW-tik beherako tokiko instalazioetarako; eta bestea 380 MW-koa, beste iturri batzuetarako (220 MW-ko erreserba eguzki-energia termoelektrikorako, 140 MW-koa biomasarako eta 20 MW-koa beste teknologia batzuetarako). Norgehiagoka-prozedura 2022ko urriaren 25ean eginen da.
Biomasa bero industriala sortzeko erabiltzeak baso-suteak prebenitzen laguntzen du, Industria eta Energia Foroko adituek adierazten dutenez. Baso-biomasa oso baliabide erabilgarria da suteak prebenitzeko; izan ere, azkar erretzen diren elementuak mendian pilatzea saihesten du, eta, aldi berean, energia-iturri garbia da, klima-aldaketa prebenitzen laguntzeko.
Europako Batzordearen Ikergune Komunak Lehortea Europan - 2022ko uztaila txostena argitaratu du, Europako lehortearen egoeraren ebaluazioa egiten duena Europako Lehortearen Behatokiaren datuetan oinarritua. Lehorte luzearen bilakaera eta inpaktua EBn aztertuta, ikusten da gaur egun EU+UKren % 44 lehortearen ohartarazpen mailan dagoela, eta EU+UKren % 9 alerta mailan; izan ere, lurzoruak hezetasun-defizita du eta landarediak, berriz, estres handia.
Europar Batasunak Errusiatik datorren gasaren horniduran beste murrizketa batzuei aurre egin beharko die agian; izan ere, kremlina arma gisa erabiltzen ari da bere gasaren esportazioak, eta horniduraren murrizketak estatu kideen ia erdiei eragin die dagoeneko. Horregatik, Batzordeak legegintza-tresna berri bat eta Gas Eskaria Murrizteko Europako Plana proposatu ditu, Europan gas kontsumoa % 15 murrizteko asmoz hurrengo udaberrira arte. Kontsumitzaile guztiek, administrazio publikoek, familiek, elektrizitatearen hornitzaileek eta industriak gasa aurrezteko neurriak har ditzakete, eta hartu egin behar dituzte.
2020an COVID-19aren hedapena geldiarazteko blokeo nazionalak eta neurri murriztaileak ezarri ondoren, 2021ean jarduera ekonomikoak gora egin zuen EBko herrialde askotan, eta horrek eragina izan zuen EBko energiaren erabileran. EBko elektrizitate-hornidura osoa % 4,2 handitu zen 2020arekin alderatuta, eta aurretiazko datuek adierazten dute erregai fosilak berriro izan zirela iturri nagusia, nahiz eta 2020an energia berriztagarriak erregai fosilak baino gehiago erabili ziren elektrizitatea sortzeko.
Aintzat hartuta premiazkoa dela lan egitea Europar Batasunean eta Norvegian energia-independentzia handitzeko eta energiaren prezioak murrizteko, eta, aldi berean, hemendik 2030era berotegi-efektuko gasen emisioak murrizteko eta Europaren erresilientzia hobetzeko Errusiak Ukraina inbaditzearen eta klima-aldaketaren ondorio negatiboen aurrean, erabaki da are gehiago indartzea Europar Batasunaren eta Norvegiaren artean energiaren arloan dagoen lankidetza estua, epe luzera bien arteko lotura energetikoa sakonagoa izan dadin.
Europako Batzordeak pozik hartu du Kanadak Alemaniara gasbide-turbina bat itzultzeko hartutako erabakia, hura konpondu ondoren, Nord Stream 1 gasbidean erabiltzeko. Zati hori itzulita, Errusiak gas-fluxuak murrizteko erabili duen aitzakietako bat desagertzen da. Batzordeak harreman estua izan du Alemaniarekin eta Kanadarekin gai horri buruz, bai eta Siemens enpresarekin ere, egoerari buruzko informazio egokia jasotzen genuela bermatzeko.
EBk 1.800 milioi euro baino gehiago inbertituko du teknologia garbien eskala handiko hamazazpi proiektu berritzailetan, Berrikuntza Funtsaren kargurako dirulaguntzen hirugarren txandan. Dirulaguntza horien bidez, abangoardiako teknologiak sartu nahi dira merkatuan arlo hauetan: energia asko kontsumitzen duten industriak, hidrogenoa, energia berriztagarriak, karbonoa atzitzeko eta biltegiratzeko azpiegiturak eta energia biltegiratzeko eta energia berriztagarriak ekoizteko funtsezko osagaien fabrikazioa.
