Nafarroa Europa mailan ezaguna da jardunbide egokien erreferentzia gisa, bai energia berriztagarrien ekoizpenari dagokionez (hura garatzearen aldeko apustu teknologiko eta enpresarial argia egin du) bai baliabideen kontserbazioari eta ustiapenari eta ingurumenaren kudeaketari dagokienez. Orobat, esan daiteke klima aldaketaren aurkako borroka bere gain hartu dituen konpromiso nagusietako bat dela.
Foru Komunitateak urte batzuk lehenago erdietsi zituen Europaren 2020rako helburuak, eta barnean kontsumitzen dena baino energia elektriko gehiago sortzera iritsi zen. Nafarroan kontsumo elektrikoaren % 80 baino gehiago energia berriztagarrien bidez ekoizten da. 
Gainera, 2008-2013 aldian hirugarren arlo ekonomiko modura kokatu da patenteen kopuruari dagokionez, guztizkoaren % 6,4ra iritsi baita, Energia Berriztagarrien Zentro Nazionalaren (CENER) laguntzarekin.
Helburua energia fosilen (erregaiak) eta lehengaien kontsumoa murriztea da, energia berriztagarrien ekoizpena handituz, eraginkortasun energetikoa hobetuz, eta hondakinen eta baliabide naturalen kudeaketan oinarriturik gorabidean dauden sektoreak sendotuz. Sektore honek duen garrantziaren gaineko informazioa Nafarroako 2020 Industria Planean duzu.
Foro honetako partaide izan nahi baduzu, bete ezazu atxikimendu formularioa eta sektore honen gainean Europan dagoen informazioa modu pertsonalizatuan igorriko dizugu. Horretaz gainera, antolatzen diren foro presentzialetan parte hartzeko aukera izanen duzu.
Clariant kimika enpresak lehen etanol zelulosikoa ekoitzi du Podariko (Errumania) instalazioan, Europako funtsekin finantzatutako SUNLIQUID eta LIGNOFLAG proiektuen finantza laguntzarekin. Erreferentziako instalazioak tokiko nekazaritza-hondakinak prozesatuko ditu urtean berrogeita hamar mila tona etanol zelulosiko inguru ekoizteko, “sunliquid” teknologiaren laguntzarekin.
Energia-kontsumo handiko industriak teknologia berri garbiak bilatzen ari dira, jasangarritasunaren arloan asmo handiko helburuak lortzeko. Hori lortzeko, elektrolisiak funtsezko zeregina izanen du. Elektrolisiak sortutako hidrogeno berdea etorkizun handikoa da erregai fosilak ordezteko eta CO2-aren isuriak murrizteko. Europako funtsekin finantzatutako MultiPLHY proiektuari esker, aukera hori hurbilago dago.
Energia-iturri berriztagarriak klimaren mende daude, eta, ondorioz, aldakorrak dira berez. Europako funtsekin finantzatutako FuturePowerFlow proiektuak «software» berri bat garatu du, energia-fluxua 48 ordu lehenago aurreikus dezakeena. Horri esker, sareen operadoreek modu eraginkorragoan kudea ditzakete beren sistemak.
2020ko urrian, PROSEU aurkeztu zen. Proiektu horrek herritar arruntak ahalduntzen zituen, energia berriztagarrirako Europako trantsizioan funtsezko eginkizuna bete zezaten. Europako prosumitzaileei — beren energia berriztagarria ekoizten eta kontsumitzen duten pertsonei — lagundu al zien trantsizio horren eragile nagusi bihurtzen? Erantzuna da ezen, lan egin zen komunitate askotan, proiektuak benetako eragina izan zuela.
SUNRISE koordinazio- eta laguntza-ekintza (CSA) asmo handiko proiektu zientifiko eta teknologikoa da, eguzki energia eta gas atmosferikoak (hala nola CO2, ura eta nitrogenoa) aprobetxatzeko helburua duena, energia kontsumo handiko erregai fosilei eta konposatuen sintesi kimikoaren prozesuari alternatiba jasangarria emateko. CSA horren helburua da ibilbide-orri zientifiko eta teknologiko bat ematea, hamar urtean erregai berriztagarrien ekoizpenak prestakuntza teknologikoaren 9. maila (TRL 9) lor dezan, 0,4 euro/l-ko kostuan, eta atmosferako CO2-aren fotobihurketak, berriz, TRL 7.
Premiazkoa da karbonoan neutroa den ekonomia lortzeko trantsizioa egitea, kutsadura murrizteko, baliabideen eskasiari aurre egiteko eta hazkunde ekonomikoari laguntzeko. Europako funtsekin finantzatutako SYSTEMIC proiektuaren helburua da etorkizun handieneko teknologiak hautatzea eta biohondakinak balorizatzeko nola aplika daitezkeen erakustea, eskala handiko produktu eta energia ekologiko bihurtuz.