JRCren txosten berriaren arabera, Europan bada ustiatu gabeko potentzial bat; lehengai estrategikoak atera litezke meatze-hondakinetatik eta zabortegietatik. Praktika horien garapena hobetzeko, txostenak informazioa ematen du arlo horretako politikaren testuinguruari buruz, bai eta erabiltzen diren azken ezagutzei eta teknologiei buruz ere, eta identifikatzen ditu jardunbide egokiak eta gainditu beharreko erronkak. Industriarako funtsezkoak izateaz gain, lehengaiak gure eguneroko bizimoduaren parte dira, eta bizirauteko behar ditugu.
NBEren Klima Aldaketari buruzko Gobernuarteko Taldeak (IPCC) txosten batean finkatu du zein neurri hartu behar diren berotze globala gelditzeko, gure planetan inpaktu konponezinak saihesteko eta Parisko Akordioaren helburua betetzeko (tenperatura globalaren igoera 1,5 ºC-ra mugatzea mende honen amaierarako). Munduko klimaren arloan onenetarikoak diren ehunka zientzialariren ekarpenak biltzen ditu txostenak, eta erakusten du negutegi efektuko gasen emisio globalak gora eta gora doazela.
Plastics Europe Europako plastiko ekoizleen ordezkariak pozik hartu du “ReShaping Plastics: pathways to a circular, climate neutral plastics system in Europe” izeneko txosten independente berria. Elkarteak txosteneko aurkikuntza nagusien alde egiten du. Aurkikuntza horien arabera, funtsezkoa da aldaketa sistemiko azkarragoa ezartzea eta lankidetza biziagoa eta eraginkorragoa izatea arduradun politikoen eta plastikoen Europako ekosistemako alderdi guztien artean.
Ellen MacArthur Fundazioaren txostenak erabilera bakarreko ontzi malguen gainean duen jarrera azpimarratzen du: lehenik, deuseztatzea; bigarrenik, goranzko berrikuntza; eta, azkenik, inbertsio handia egitea bildu, sailkatu eta birziklatzeko azpiegituretan. Txostenak barnean hartzen ditu bai enpresek, bai legegileek, ontzi malguen ekonomia zirkular baterako trantsizioa errazteko eskatzen dituzten “premiazko ekintzak”, balio-kate osoan behar diren neurriak areagotuta.
Energiari buruzko informazio-orri honetan, IEAk azaltzen du zergatik den Errusia hain eragile garrantzitsua munduko energia merkatuetan. Petrolio gordinaren munduko hiru ekoizle nagusietako bat da, eta Saudi Arabiarekin eta Estatu Batuekin lehiatzen da lehen postua lortzeko. Gainera, Errusia da gas naturalaren munduko bigarren ekoizle handiena, Estatu Batuen atzetik, eta munduko gas erreserba handienak ditu. Errusia da, halaber, munduko gas esportatzaile nagusia.
Nazioarteko Energia Agentziaren (IEA) Petrolio Merkatuaren Txostena petrolioaren mundu-merkatuari buruzko datuen, iragarpenen eta analisien iturri entzutetsuenetakoa da. 2022ko martxorako nabarmendu duen alderdien artean adierazi du espero dela nabarmen ahulduko dela munduko hazkunde ekonomikoa, lehengaien prezioen igoeraren eta Ukrainaren inbasioaren ondoren Errusiaren aurka ezarritako nazioarteko zigorren ondorioz. Gainera, azaldu du munduko petrolio-horniduran astindu bat gertatzeko arriskua dagoela, Errusiako petrolio ekoizpenean eskala handiko etendurak gertatzeko aukera dela-eta.
Transitions Performance Index-ek EBko estatu kideak eta beste 45 herrialde sailkatzen ditu, 2011 eta 2020 bitartean jasangarritasun maila bidezkoa eta oparoa lortzeko bidean aurreratukoaren arabera. Txostenak, halaber, aurrerapen orokorra erakusten du lau trantsizio espezifikotan (ekonomikoa, soziala, ingurumenekoa eta gobernantzakoa). Trantsizio horiek EBren agenda politikoa eta Nazio Batuen Erakundeko Garapen Jasangarrirako Helburuak jasotzen dituzte. Indizeak berretsi du EBko ia herrialde guztiek ongi egin dutela aurrera azken hamarkadan.
Europako Batzordeak normalizazio estrategia berri bat argitaratu du estandar globaletan Europaren lidergoa bermatzeko, ekonomia berdean eta digitalean inbertsioak bultzatzeko eta teknologia berriek dituzten erronketarako prestatzeko. Helburu horiek lortzeko, estrategiak Europako normalizazio prozesuak laburtu nahi ditu, eta Europako normalizazio sistemaren gobernantza hobetu.
Batzordeak argitaratutako dokumentu batek erakusten du Europar Batasunak hidrogeno garbiari buruzko ikerketan eta berrikuntzan egiten duen inbertsioak duen garrantzia, energia berderanzko trantsizioa bizkortzeko eta Europako Itun Berdearen 2050erako helburuak lortzeko. Dokumentuak ikerketarekin eta inbertsioarekin lotutako tresnak deskribatzen ditu, baita etorkizun hurbilean hidrogenoaren teknologiak merkatuan ezartzeko erronkak eta aukerak ere.
Adostasun handia dago Europako hazkunde ekonomikoaren eredurako lehentasunei buruz, trantsizio berdea eta digitala barne, eta EBren erresilientzia ekonomiko eta soziala hobetzeko premiari buruz, bai eta etorkizuneko krisietarako gure prestakuntzari buruz ere. Dokumentu honetan, Batzordeak hazkunde justu eta inklusiboaren eta jasangarritasun lehiakorraren helburuak batera sustatzeko lehentasunak nabarmentzen ditu.
Klima Aldaketari buruzko Gobernuarteko Taldeak (IPCC) klima-aldaketarekin lotutako inpaktuei, egokitzapenari eta ahultasunei buruzko azken txostena argitaratu du. Txostenak baieztatzen du klima-aldaketak gurekin jarraituko duela eta haren ondorioetako batzuk jada saihestezinak direla. Txosten horren arabera, gizakiek eragindako klima-aldaketak dagoeneko gogorrago eta sarriago eragiten die naturari eta pertsonei, eta lehen uste zena baino eremu geografiko zabalagoan, gainera.
"Emerging AI and Data Driven Business Models in Europe" txostenean EIT (European Institute of Innovation and Technology) Artificial Intelligence Community erakundeak hainbat galderari erantzuten die, hala nola zeintzuk diren adimen artifizialeko negozio-ereduak Europan, zein den Europaren egungo panorama AAri dagokionez, edo zein den AAren eragina hainbat sektoretan eta ingurumenean.
